L078
D044 : In Simulacrum Spei.
Au simulachre de Esperance.
Quelz pinceaux ont portraict ceste gente deesse,
Que la face a riant, & monstre a tous liesse?
Elphidius me fist, Esperance on me nomme,
Prestant a coup mon bien a tout miserable homme.
Ma robe verte enseigne que en joye j'entretiens,
Et ce, jusque a la mort, dont le dard rompu tiens:
Ou quel temps, est cassé tout le bien que donnoye:
Ainsi conduis les gens, a fin, sans grand monnoye.
Ce tonneau ou je seetz, faict rapport de l'histoire,
Dont Hesiode a fait excellente memoire.
Car lors que du tonneau vertus au ciel volerent:
Et que grans maulx urgens parmy le monde allerent:
Seullete demouray, monstrant que je esperance
Suis la seulle vertu, plus prestant d'assurance.
La Corneille est pres moy, en son chanter ayant
Reconfort du demain, qui est maint mal rayant.
Le compaignon prochain, se dit bonne adventure:
Qui avec Cupido faict souhaits sans mesure.
Mais Nemesis derriere attend ceulx qui font faulte,
Pour chacun corriger, d'esperance trop haulte.