Switch to Dual Emblem Display

Link to an image of this page  Link to an image of this page  [e1v p34]

Mieux vaut mourir que vivre sans vertu.

NAture, sans aucune difference, a donné à tous le be-
nefice de vivre: mais la seule vertu nous enseigne à
bien façonner & conduire ceste vie, laquelle, ores qu’el-
le soit commune aus mauvais comme aus bons, celle seu-
le, toutesfois, doit vrayement estre appellée vie, qui n’est
donnée par le pere de lumiere qu’au sectateur de vertu:
car la vie separée de vertu, seulement n’est pas vie, mais
est pire que la mort mesmes, là ou le vertueus joüit de
l’immortalité. Il n’y a noblesse qui puisse estre establie
ny retenue en son estre sans la vertu. Qui ne met en avant
que la splendeur de ses predécesseurs, & ne produit que
les anciens registres, les monuments, & les armes de ses
ancestres, est plustot noble d’opinion que d’effect: Mais
qui possede de la vertu, certaine origine d’honneur, sera
tousjours, & par tout, en reputation de personne qui me-
rite le vray tiltre de noblesse, laquelle, à vray dire, n’est
autre chose qu’une constante vertu qui n’a sa loüange
ailleurs qu’és belles actions: Et pourtant elle ne doit estre
jugée sur la preuve des paroles, ains sur le tesmoignage
des effects: encores que vertu ait cela de propre, qu’elle
dirige la vie par paroles & par faicts qui conviennent en
integrité, & fait que les actions ne desmentent point le
langage. C’est moquerie à celuy qui enseigne autruy le
moyen de bien vivre, si par les moeurs corrompues il se
monstre contraire à ses preceptes. Apprenons aussi que
une seule action ne preuve pas assez nostre probité &
preud’hommie, ains une vertu constante & continuée
par tout le cours de ceste vie.

Link to an image of this page  Link to an image of this page  [e2r p35]

IX.

VITA VIRTUTIS EXPERS MORTE PEIOR.

Nature simplement nous concede la vie:
Mais vertu nous apprend à la bien niveller;
La premiere à son laict chacun vient appeller,
La seconde à son pain rien que bon ne convie.
La vie sans vertu d’ordinaire est suyvie
De langueurs & de maus qui troublent son repos:
Elle est de son destin choquée à tous propos,
Et tousjours sur le point de nous estre ravie.



Iconclass Keywords

Relating to the image:

Relating to the text:


Hint: You can turn translations and name underlining on or off using the preferences page.

 

Back to top