Switch to Dual Emblem Display

Link to an image of this page  Link to an image of this page  [l3v p86]

Rien ne nuit tant qu’une feinte bonté.

RIen ne peut arriver de plus pernicieus & mortel, en
la distribution de la justice, qui maintient la socie-
té humaine, que quand elle est commise à personnes qui
s’y comportent de sorte que lors qu’ils nuisent le plus, &
pipent ouvertement le monde par leur astuce, ils vueillent
neantmoins estre reputez gens de bien. Certes hypocri-
sie est un vice detestable, qui destruit & ruyne les liens de
ceste societé: elle est bien à blasmer en tous: mais notam-
ment elle est abominable en ceus qui soubs pretexte &
couverture de religion & de pieté causent & fomentent
leurs propres haines & ambitions. Or comme la princi-
pale partie de justice est de rendre le droit à chacun, &
d’empescher qu’il soit fait injure à personne, c’est une
insigne injustice de nuire à autruy soubs le manteau de
charité: ce qui se doit abhorrer, d’autant plus que nous
evitons aisément l’ennemy cognu, & tombons encores
plus facilement aus pieges du calomniateur hypocrite,
qui aura plus de moyens de nous faire sentir ses outra-
ges, & les effects de sa mauvaise volonté, s’il tient rang d’
homme de bien, & à credit & pouvoir entre le peuple.
En somme il n’est pas à croire qu’il soit rien si dangereus,
ny qui tienne tant de la brutalité, que quand ceus qui ont
autorité sur autruy en usent avec aigreur & cruauté, &
neantmoins palient leur mauvaise intention avec le fard
de pieté & preud’hommie.

Link to an image of this page  Link to an image of this page  [l4r p87]

XXXV.

PRAETEXTU NOCENTIOR.[1]

Nous n’avons entre nous peste plus dangereuse
Que celuy qui, meschant, simule pieté,
Et qui paroist couvert d’un masque de bonté,
En faicts entier & juste, en moeurs pure & modeste.
Detestable pipeur, qui tant plus il moleste
L’incoulpable innocent d’outrages scandaleus,
Tant plus il veut paroistre & grave, & sourcilleus,
Et couvrir le poison de son humeur funeste.

Notes:

1.  For a similar pictura, see Montenay, no. 25 ([FMOa025]).



Iconclass Keywords

Relating to the image:

Relating to the text:


Hint: You can turn translations and name underlining on or off using the preferences page.

 

Back to top