La tasse de Nestor.

Dy moy, qu’Homere entend, quand il dit que Nestor
Avoit tasse d’argent, à double fonds, cloux d’or,[1]
Quatre anses à l’entour, sur chacune desquelles
Se posoit un pigeon, aux argentines aisles?
Tasse, que fors Nestor nul tenoit sur sa
dextre?
Ceste tasse est le ciel, qui tout d’argent semble estre,
  Link to an image of this page  [M2r p179] Cloux d’or estoiles sont du ciel estincelantes.
Il appelle pigeons les Pleiades brillantes,
Et son double nombril, l’ourse grande & petite.
Nestor sage entendit cecy par longue suite.
Les forts la guerre font, ne pensant qu’à la terre,
Mais le sage et prudent monte au ciel à grand erre.

Commentaires.

Non seulement Homere, mais Athenee, & plu-
sieurs autres depeignent ceste tasse. Cest embleme
nous enseigne qu’il faut faire beaucoup plus de cas
des doctes hommes, & aspirans au ciel, que non pas
des vaillans & belliqueux. Athenee met six pigeons,
qui se rapporte mieux aux Pleiades, qui combien
qu’elles soyent sept, n’apparoissent toutesfois guieres
souvent que six. Le reste de cest embleme est assez
clair sans autre exposition.