Fureur & rage.

Ce bouclier un lion porte plein de fureur,
Le lion, lequel est des humains la terreur:
De ce bouclier estoit Agamemnon le maistre,
Le plus fort & vaillant qu’aucun autre eust peu estre.[1]

Commentaires.

Anciennement la plus part des Princes & grands
Seigneurs, ne chargeoyent leurs armoiries de chose
qui ressentist sa superbe ou cruauté: mais l’expedition
de Godefroy de Bouillon en la terre saincte, remplit
les armoiries des Rois & Princes d’Aigles, de Gry-
phons, de Lions, & autres furieux animaux. Le Roy
de France presque seul entre tous retint ses blanches
fleurdelis. Mais, helas! & jadis, & de nostre siecle,
plusieurs Seigneurs font sentir & experimenter à
leurs peuples la tyrannie & cruauté des animaux
qu’ils portent en leurs armoiries. Peu, ou peut estre,
pas un, n’aspire à acquerir le surnom d’Aristide. Le
bouclier d’Agamemnon a demeuré quelque temps
pendu au temple Olympique.