De Paix abondance.

Sur Roc en mer, vray lieu de paix,
Alcyone pour ses petits
Son nid d’espics & vigne espais,[1]
Bastit selon les appetits:
Celà monstre les biens gentils,
Qu’on a quand lon veut paix poursuyvre,
En bleds & vins sont lieux fertils,
Où le Roy sçait tel oiseau suyvre.[2]

commentaires.

Les alcyones, sont des oiseaux maritimes, lesquels,
en la plus froide saison de l’annee, & les tempestes e-
stans les plus furieuses, font leur nid en la mer, sur
quelque roc: lequel nid ils bastissent de grands epics
de bled, l’environnant de petits rameaux & fruicts
de la vigne. Dieu fait tant de faveur à cest oiselet, que
si tost qu’il a commencé à pondre ses oeufs, tous vents
& tempestes s’appaisent: si que la mer devient coye
& tranquille durant quatorze jours, lesquels les ma-
riniers observent diligemment, estans certains que
durant lesdits quatorze jours ils ne souffrirent aucu-
ne tempeste. Si les Rois pouvoyent imiter ces oiselets,
gouvernans & maintenans leurs subjects en toute
paix & tranquillité, leur regne fleuriroit en toute a-
bondance de bleds, vins, & toutes autres denrees.