Le Cypres.

Le Cypres monstre en sa fueille, comment
Il fault traicter les siens egalement.

L’arbre du Cypres depuys sa racine mon-
te tout droict, egal jusque au plus hault de
son tige, auquel il jecte branches en co-
ronne environnantes, toutes en leur reng de
mesme grandeur, & grosseur, ainsi ordonnées
sans que l’une passe l’aultre, jusque au sommet,
  Link to an image of this page  [R2r p259]ou il faict ung Cone, ou poincte demye ovale. La-
quelle egale figure enseigne les parens de traicter leurs
enfans tant aisnéz, que puisnéz, tant masles, que fe-
melles en pareille condition, & affection, sans acce-
ption de personne, tant en nourriture. & entretene-
ment, que en hoirie, & testament. Car ilz sont egale-
ment naturelz, & legitimes. Laquelle aequalite ne se
observe pas es Pays de droict escript, comme au
Lyonnois.

Riches tombeaux le Cypres environne:
Les monumens du Peuple Ache coronne.[1]

Costume estoit aulx anciens Rommains, pour faire
honneur à leurs parens, ou amys trespasséz de co-
ronner, & environner de fueillages, & fleurs en forme
de Chappelletz Les sepulchres. Or les Monumens
de ceulx de la Seigneurie estoient coronnez de Cy-
pres: & ceulx du commun populaire de Ache (non de
persil) lesquelz tous deux sont quasi de semblable
fueille, couleur, odeur, & faculté, à praeserver de pour-
riture.

Le Cypres est en fueilles bien construict,
Mais belle fueille il porte, & point de fruyct.[2]

Cecy peut estre dict des beaulx hommes, bien raméz
de membres, & de mignons bien peignéz, & testou-
néz, ou de belles femmes beaux cheveulx, qui au de-
mourant ne valent rien, & ne portent point de fruyct.