Tenir caché le secret.

Romains jadis firent pourtraire
Le Minotaure en leur enseigne:[1]
Dire en ce voulans, qu’on doit taire
Secret de quelque part qu’il vienne:[2]
Et à fin que sur ce on comprenne
De tell’ peinture la raison,
Nul n’est vivant qui entreprenne.
Tirer tel monstre hors sa maison.

commentaires.

Pasiphaë, fille du Soleil, & femme de Minos Roy
de Crete, se laissa emporter à l’abominable amour
d’un taureau, & en fut tellement embrasee, qu’elle se
fit enfermer dans une vache de bois, à fin que ce tau-
reau la congnust. De ce detestable accouplement nasquit
un horrible monstre, qui estoit demi homme, & demi
taureau, dont il fut appellé Minotaure. Le Roy Mi-
nos, voulant oster ce monstre hors de la veuë des
hommes, commanda à Dedale, (ingenieux ouvrier
Athenien, qui mesmes avoit fabriqué la vache de bois)
de luy bastir un labyrinthe, enveloppé & construit
avec tant de difficiles destours, que qui y entroit une
fois, à grand’ peine en pouvoit-il jamais sortir: & là
dedans enferma il le Minotaure. Les Romains por-
toyent autresfois ceste peincture en leurs enseignes de
guerre, donnans à entendre, que les conseils secrets des
  Link to an image of this page  [B1r p17] Princes, doyvent estre merveilleusement couverts &
cachés: car estant descouverts, ils sont cause de beau-
coup de maux. Partant ceux qui president aux repu-
bliques & aux estats, se doyvent bien garder de des-
couvrir leurs conseils, quand bien ce seroit à leurs plus
grands amis. C’est pourquoy un grand Capitaine
Romain respondit à un de ses plus familiers, qui de-
siroit sçavoir de luy ses desseings, Si je sçavois que ma
chemise les sceust, je la bruslerois tout maintenant.