Eloquence vaut mieux que
force.[1]

L’arc en la main, en l’autre la massue,
Peau de Lyon estant cy apperceuë,
Pour Hercules me fait ce vieillard croire:
Mais ce qu’il a marqué de si grand’, gloire,
Que mener gents enchainés à sa langue,
Entendre veut, qu’il fit tant bien harangue,
Que les François, pour ses dits de merveilles,

Furent ainsi que pris par les oreilles.
Si donc il a par loix & ordonnances
Rangé les gents, plustost que par vaillances,
Dira lon pas (comme c’est verité)
Que l’espee a lieu aux livres quitté?
Et qu’un dur coeur par sages mieux se range,
Que gros effort son aspresté ne change?
Pource Hercules n’usa pas de grand’ force:
Et si chacun de le suyvre s’efforce.

commentaires.

Il descrit icy un homme, qui en sa senestre a son arc,
& en sa dextre sa masse ferree, & une peau de Lion
pour toute couverture. C’est donc icy l’effigie d’Her-
cules. Mais ses cheveux blancs, ny ces chainettes, qui
sont attachees à sa langue d’un costé, & de l’autre
sont attachees aux oreilles de plusieurs personnes: celà,
dis-je, ne s’accorde pas à la forme qu’on peint coustu-
  Link to an image of this page  [I4r p135] mierement Hercules. Ces cheveux blancs, & ces chai-
nettes signifient, qu’Hercules, de quelques grands for-
ces qu’il fust doué, ne mit pas sous sa puissance tant
de peuples farouches, comme feroit un jeune homme,
par sa force & par ses armes, mais bien les dompta-il
par sa singuliere eloquence, & par son insigne pru-
dence, qui accompagne ordinairement les vieillards
& experimentés. Les armes souvent quittent la place
à la longue robbe: & bien souvent les plus fascheuses
guerres sont appaisees & esteinctes par un beau par-
ler, & par un docte discours. La longue robbe est
souvent prise pour la paix, comme aussi c’estoit l’ha-
bit ordinaire des Rommains lors qu’ils n’avoyent
point de guerre.