Autre.

L’Oyseau qui seulement vole environ la nuict,
Lousche & aislé se voit, & la lumiere fuyt,
Ressemblant à un Rat, de corps en quelque sorte.
Plusieurs marques en soy, & maints signes il porte.
En premier, sont comprins les fuyards endebtez,
Ou bien les convaincus & de crime notez,
Qui se cachent de jour, ne vont qu’en nuict obscure.
En-apres il se prend pour la soigneuse cure
Des doctes, qui voulans par sens trop curieux
Comprendre les secrets admirables des cieux,
S’aveuglent en discours si perplex: somme toute,
Pensans assez bien voir, du tout ne voyent goutte.
Brief sont cy entenduz ces finastres menteurs,
Qui clochans des deux pieds comme asseurez trompeurs,
Colludans des deux parts ausquels on ne se fie,
Sont tenus pour suspects d’une & autre partie.

IL a basti cest Embleme prenant occasion
sur[2] la diverse signification du mot de
Chauvesouris, que les hommes de lettres
prennent en plusieurs sens. Premierement
il est dit de ceux qui sont endebtez, lesquels
de peur qu’ils ont d’estre tirez en jugement,
& ne soient contraints à toute reste de faire
payement, fuyent la lumiere, comme les
  Link to an image of this page  [K6v f90v]Chauvesouris, & vollent seulement parmy
les tenebres de la nuict, & au silence de la
Lune. Il est usurpé aussi pour signifier ces
brouillons, qui font estat de faire profession
d’une science ou ils n’entendent rien: car ils
feignent estre ce qu’ils ne sont pas, & com-
me ces oyseaux là en lieu de plumes bran-
lent leurs peaux, ressemblans à des souris:
car ils recerchent les secrets de nature & des
choses cachees, mais en vain. Brief ce mot
est dit de certains rusez & trompeurs, qui
ne s’addonnent à suivre ny party ny autre,
mais colludent avec tous les deux; lesquels
toutesfois ayans accoustumé d’affronter un
chacun, ils se rendent suspects & haïs de
tous.