Endure & te contiens.

COmme l’adversité l’on doit en patience
Supporter doucement, & ne s’en chagriner:
Aussi ne fault avoir au trop grand heur fiance,
Ains à toutes les deux pertinemment soigner.
Ce que par le propos nous pouvons ordonner
D’Epictete disant ainsi souffre & t’abstien,
Fault beaucoup endurer par un sage entretien,
Et s’abstenir de tout ce qui est deshonneste.
Ainsi le beuf lié, de son maistre l’attache
Souffre patiemment, & s’abstient de la vache,
Qui est grosse desja, quoy qu’il soit une beste.

On dit que le Philosophe Epictete
par ces deux mots, souffre & t’abstiens,
comprenoit toute la raison de bien vivre.
Par le premier il enhortoit les hommes à
patience, qui est comme le support & gar-
de de toutes vertus, à ce que par icelle cha-
cun se munist contre toutes impetuositez
de fortune, & que tous labeurs necessaires
à la vie fussent supportez allegrement. Par
le second mot il vouloit dire qu’il se fault
contenir de toute desbauche, & principa-
lement de paillardise, comme aussi du boi-
re & du manger excessif. Ce qui est icy figu-
ré par le taureau, lequel estant lié par le jar-
ret, obeyt à son maistre, & s’abstient d’ap-
procher les vaches aucunement qui sont ja
pleines.