La Chimere (c’est à dire les puissans &
les deceveurs) se surmonte par con-
seil & par Vertu.

Bellerophon, preux chevalier,
Peut surmonter Chimere horrible,
Ensemble tout monstre terrible,
De Lycie estant au quartier.[1]
Ainsi que veut le vray sentier
De vertu suyvre, & sur Pegaise
Monter au ciel, à son bel aise
Peut surmonter tout encombrier.

commentaires.

Bellerophon, fils du Roy Glauque, fut un jeune
homme de grande beauté & d’excellente vertu.
Proetus, l’ayant despouillé de son royaume, le con-
traignit de luy estre serviteur. Mais Sthenoboea, fem-
me de Proetus, s’amouracha de luy, & le requit d’a-
mourettes. Bellerophon repoussa au loin ceste femme
lascive. Elle, pleine de fureur, pour avoir esté mespri-
see, l’accusa faussement au Roy, comme si il l’eust vou-
lu desbaucher. Ce qu’ayant oui le Roy, & ne vou-
lant toutesfois le chastier en sa maison, l’envoya au Roy
de Lycie, son beau pere, avec une lettre qui contenoit
le crime qu’on luy imposoit. Le Roy de Lycie, ayant
leu les lettres, fut merveilleusement irrité contre luy,
si que pour le perdre, il l’exposa à divers ennemis, &
à divers dangers. Mais Bellerophon demeura victo-
rieux par tout. En fin estant envoyé contre la Chi-
  Link to an image of this page  [K4r p151] mere, (Chimere estoit un horrible monstre en Ly-
cie, ayant teste de lion, corps de chevre, & queuë
de dragon, jectant feu & flamme par la gueule:) Bel-
lerophon, dis-je, envoyé contre la Chimere, trouva
moyen d’attrapper finement Pegase, cheval aislé, mon-
ta dessus, & avec son aide combatit, vainquit, & tua
la Chimere: d’où il acquit si grand’ louange, que le
Roy de Lycie luy bailla son autre fille à femme. Ce
qu’entendant la femme de Proetus, elle se tua elle me-
sme. Nous sommes appris par cest embleme, que les
meschans & les pervers, il nous les faut surmonter
& supprimer par les vertus de l’ame, c’est à dire par
la magnanimité, par le conseil, & par la prudence.
Or qui voudra sçavoir que c’est que Chimere, quoy
Pegase, & autres pareilles fictions poëtiques, il
pourra recercher les livres de ceux qui ont traicté
des fables.