RAISON D’ESPRIT AVEC
TRAVAIL DE CORPS.

Pourquoy faict on Chiron en pourtraicture
De double forme & de double Nature?
Homme devant, & derriere cheval?
Human en hault: bestial en aval,
D’un arc bendé tirant une sagette
Vers les haulx cieulx, ou sa visée il jecte?
Est ce pourtant que la marque, & la forme
Propre de l’homme, est Raison, & sa norme?
Et de la beste à quatre piedz l’office
Propre, & nayf: C’est labeur, & service?
L’image donc de Chiron faict entendre
Que qui vouldra à haulte chose tendre:
Visant au but de celeste maison,
Luy fault avoir Labeur avec raison.