LA MORT DU DOMMAGEABLE
EST A TOUS AGREABLE

Le porc est beste à nul bien faire née.
Gastant les biens de l’espoir de l’année.
Quand il est vif: il nuict, & desconfit.
Quand il est mort, il duict, & faict profit.
Mais le malfaict la beste restitue.
Car quand au mois de Decembre on le tue:
Et qu’il vomit l’ame, & le sang ensemble.
Le voisinage à sa mort tout s’assemble.
Hommes, Enfans, Femmes, en un monceau,
S’esiouyssans de la mort du porceau.
D’ond on luy faict de paille un feu de joye.
Puys on le part: & de l’ame on envoye
A ses voisins, pour estraines & dons,
Comme Bodins, Andoilles, & Jambons.
La Vescie est pour la part des enfans:
Qui l’ont gaignée, au cul du porc soufflans.
Le demourant est salé, pour viande
Plus en mainage utiles, que friande.
  Link to an image of this page  [C1r p33] Ainsi faict on quand meurt un des Porceaux
De l’Epicure[1], avalleur de morseaux
Qui faict son Dieu de son ventre: & auquel
L’ame est au corps, ne servant que de sel.
Lequel vivant, pour avoir boyaux saoulz:
A renversé tout ce dessus dessoubz.
On s’esioyt alors on se recrée.
Et n’est celluy, à qui la mort n’agrée
De celluy là, duquel la cure seulle,
Estoit saouler, & son ventre, & sa gueulle.
Car repeuz sont plusieurs gens non ingratz
Du bien, dequoy un seul estoit trop gras.
Et par la mort duquel plusieurs ont vie.
Car il commence à l’heure qu’il devie
De proficter: estant de bien mutile
Quand vif estoit. Quand il est mort utile.