ADULTERE.

Par Rage ardent de luxure eschaufée,
Tant fort aima la Royne Pasiphée
Un beau Toreau:[1] que pour contre Nature
Se joindre à luy, par l’art, & la facture
De l’ouvrier ingenieux Daidal,
Enclorre feit son corps, pis que brutal
Au ventre creux d’une vache de bois.
Faicte au nayf, fors que sans vie, & voix.
Et par dehors, couverte de la peau
D’une autre vache aimée du Toreau.
Auquel Toreau, pour son corps assembler:
Ne desdaigna vouloir vache sembler.
Oy, mais (dira quelqu’un) c’est une fable.
Une fable est, mais toutesfois croyable.
Car ce toreau estoit un Secretaire
Du Roy Minos, de la Royne Adultere.
Qu’elle receut, le cerchant pour delict,
  Link to an image of this page  [] Non du Toreau estrangier, mais du lict.
Car Quelle forme est il, ne quelle guise,
En quoy la femme aimant ne se deguise,
Pour acomplir sa luxure maligne?
Exemple en est la Dame Messaline. [2]
Qui pour saouler sa luxure impudicque,
Se deguisoit en Lyce la publicque.
Et se tenoit en putain atournée,
En plain bourdeau à tous abandonnée.
Ainsi estoit Princesse & Emperiere:
Et quant & quant paillarde bordeliere.