Le patient s’il est piqué forcene.

IL ne se trouve personne de coeur si lasche, ny de con-
dition tant abbaissée, qui ne s’efforce de venger la vio-
lence qui luy est faite: Chacun croit que s’il endure une
vieille injure il se prepare d’en recevoir une nouvelle:
car la foiblesse du coüard est le propre subjet qui pro-
voque le pervers à la continuation de ses outrages. Aussi
ne doit-on tolerer és villes bien policées la demeure de
ces mutins perturbateurs du repos. Qui pour son utilité
particuliere procure la ruine d’autrui, il entre au chemin
de sa propre perte. Certes chacun peut vacquer à son pro-
fit, pourveu que ce soit sans l’interest de son prochain, &
qui fait le contraire est plus ennemy de nature, ny que
pauvrete, ny que langueur, ny que toutes autres afflictions
qui gehennent la vie, ny mesmes que la mort. Les grans
doivent s’abstenir de violence, & se tenir rangez soubs les
loix d’equité, de droiture & d’honnesteté: parties qui ga-
rantissent d’outrages & de force la societé des hommes.
Et ceux qui ont en main le gouvernement du peuple doi-
vent, à l’exemple des bons pasteurs, tondre, & ne point
escorcher leurs brebis: car quoy qu’il en soit, les Princes
sont ordonnez de Dieu pour la conservation des bons, &
ruyne des meschans: Que s’ils abusent de la puissance qui
leur est donnée, ils se rendent indignes de leurs charges,
& en viendront à conte devant celuy qui est juge de tous,
& qui n’a aucune acception de personne.

Le courrous allumé se remet à grand peine;
Et qui en est piqué rejette la raison:
Ainsi cest escharbot, touché de ce poison,
Aus yeus de Jupiter contre l’aigle forcene.
L’offence peut troubler la raison la plus saine:
Et si la patience est blessée une fois
Elle se tourne en rage, & pratique sans chois
Tous les moyens vangeurs dont les mains elle meine.