L’espargne fait que nos biens nous suffisent.

LEs viandes, & ce qui sert d’aliment, ensemble les ve-
stemens, doivent estre desirez, plustot pour la conser-
vation de la santé & des forces naturelles, que pour ser-
vir de volupté: Il faut manger pour vivre, & non vivre
pour manger: L’homme moderé en use, non pour oppri-
mer, mais pour maintenir sa vigueur: Aussi le plaisir s’en
cueille en l’appetit, & non en la satieté. Rien ne nous des-
honore, ny ne nous abbrutit plus, que si nous nous rendons
esclaves de la panse, & recevons le joug de gourmandise.
Puis que le vivre reglé est grand tresor à qui se gouverne
par raison, fais, si ton bien ne te suffit, que par espargne tu
suffise à ton bien: & recognois que Dieu a bien pourveu
celui à qui il a donné d’une main entre-close ce qui peut
suffire, & qu’au contraire celuy doit estre eternellement
serf qui ne se contente de peu. Qui se passe avec ce qui est
necessaire recouvre à bon pris ses provisions: & qui a sa-
tisfaction de ce qui est assez, a bien ce qu’il peut desirer:
car celuy n’a faute de rien de qui les desirs sont limitez de
raison. Pour peu que tu ayes tu ne peus avoir faute, notam-
ment si tu aymes ceste belle mediocrité, qui te doit estre
plus chere que l’or mesme: car qui la suit repose chez soy
en seureté, ou l’ordure & saleté ne l’offencent point, ny
la vieillesse du bastiment, ny l’ambition de la splendeur
de coeur pleine de soubçon & d’envie. Resolvons que tant
que nous demeurerons ez termes de mediocrité en nos
desseins, & en leur execution, nous y trouverons l’hon-
neur & le contentement.

Celuy là qui de peu mesnager se contente,
Peut se glorifier avoir assez de biens:
Plustot riche est celuy qui vit de ses moyens
Que qui prodigue tient une table opulente.
Si tu trouves court l’espargne providente,
Et les despens reglez taideront [=] à passer,
Qui par sobrieté se veut bien compasser
Suffit à ses moyens, & ne s’en mescontente.