L’homme de bien est pauvre sans vergongne.

CEluy qui de ses pere & mere n’a herité que fort peu
de biens: qui par la rigueur de la guerre ou autres si-
nistres accidens a perdu ses moyens: ou qui par impruden-
ce, gourmandise, paresse, & semblables deffauts est re-
duit à pauvreté, a certainement à combattre un ennemy
fort & puissant, qui le tient en cervelle, & luy diminue son
repos: car pour quelque cause que l’homme tombe en
indigence elle luy est tres-facheuse, & luy suscite mille
opprobres: Bien est vray qu’il n’est pas rendu meilleur par
la possession des richesses: mais quoy qu’il en soit, la vertu
ne paroist point dans la necessité, & la mendicité est un
fardeau intolerable, duquel plus tu seras deschargé plus
tu seras estimé heureus. C’est pourquoy nous disons que
l’opulente succession bien-heure nostre vie, plus que ne
font les biens acquis. Non que pour cela on doive blas-
mer qui par soing & travail cerche ce qui est requis à son
entretien, consideré que pauvreté serre la porte à plu-
sieurs belles actions: Il est tres-difficile à ceus qui en sont
accablez d’atteindre à quelque degré d’honneur, qui ne
leur doit estre imputé à deshonneur: au contraire ligno-
minie [=l’ignominie] demeure au riche qui ne subvient à l’homme de
bien disetteus, puis qu’ainsi est que nous sommes nais &
respirons non pour nous, mais pour servir à la patrie, & à
nos amis, notamment à ceus que vertu rend dignes de no-
stre liberalité.

Jamais l’homme de bien ne reçoit vitupere,
Quoy qu’il soit talonné du rejetté deffaut:
Mais qui plain de richesse, avare luy défaut,
Comble de deshonneur son ame sanguinaire.
Ce que ta main courtoise eslargit volontaire
Au juste disetteus, de subside imploré,
Ne peut estre perdu, il t’est bien asseuré;
Car vertu t’en payra l’usufruict usuraire.