Raison doibt estre au conseil.

Dequoy sert la conjunction
De deux oyseaulx qui sont femelles,
Puis qu’ilz ne preuvent [=peuvent] soubz leurs aelles.
Produire generation?

★ Si Ung conseil est assemblé
Et raison ne soit la premiere,
Il sera confus & troublé,
Sans conclusion de matiere:
Car pour bien scavoir la maniere,
Et de conseil avoir l’espreuve,
Ne fault que raison soit derniere:
Mais qu’en la place elle se treuve.

★ Car tout conseil faict sans icelle,
Ne vient poinct à perfection,
Comme femelle avec femelle,
N’engendrent que corruption:
Car quand ilz font production,
De leurs oeufz, aulcun fruict n’en vient,
Tout ainsi sans droicte action,
Un conseil inutil devient.
★Voyse doncques tousjours devant
La raison comme vray guide,
Et ne mettons noz faictz avant,
Qu’elle ne tienne en main la bride,
Car si tant peu elle nous ayde,
Nostre faict bien se portera,
Et ne sera celluy timide,
Quand elle le supportera.