L’ymage de temerité

Temerité trop jeune sotte,
Sur ung cheval voltige & trote,
Sans selle, sans resne & sans bride
Et sans avoir aulcune guide.

QUi veult paindre à la verité
L’ymage de temerité,
Il fault qu’elle soit toute nue,
Et pour estre encor mieulx cogneue
Elle chevauche ung grand cheval,
Qui court & poste à mont & val,
Pource qu’il n’est encor dompté,
Car aulcun n’a sur luy monté,
Et qui pis est n’a bride ou frain
Qu’elle peust tenir à la main,
Ains court comme descongnoissante,
Sans tenir chemin voye ou sente:
Et des esperons poingt & picque
Ce cheval, qui ses piedz applique,
A ruer & saulter en l’aer,
Sy fort qu’on ne le void aller.
Elle a de fleurs une couronne,
Qui son plaisant chef environne,
Et ses cheveulx longs & espars
Derriere elle de toutes pars,
Pendent & voletent au vent.
Cette histoire est mise en avant,
Notant qu’en folle hardiesse,
N’y a grand raison & sagesse,
Car elle est trop avantageuse,
Trop indiscrete & oultrageuse.