Secret est á louer.

Ainsi que le Lymas se tient
En sa coquille en grand secret,
Tout ainsi l’homme se maintient,
Clos & couvert comme discret.

CErtes tu es grandement à priser,
Petit Lymas en ta coquille enclos,
On ne te peult occire ne briser,
Si tu n’estois de ta maison forcloz,
Tu vis leans en asseuré repos,
Tu te retrais quand on te faict offense,
Nul n’appercoit ne congnoist ton dispos,
Car ta maison te sert bien de defense.

★Ainsi debvroit faire l’homme prudent,
Se tenir coy & ferme en sa pensée,
Fuyr le mal, quand il est evident,
Prendre fortune alors qu’est advancée,
Saillir en temps quand la peur est passée,
Se declarer en temps & en saison,
Et se celer (toute craincte cessée)
Comme tu fais dans ta coque & maison.

★ Tu monstres bien par ta condition.
Que le secret sert à l’utilité,
Au grand proffit & augmentation,
De tout chascun (à dire verité)
Comme ung proverbe anticque à recité
A plusieurs gents, demeure avecques toy,[1]
Pour demonstrer en la necessité,
Qu’il n’est si bon que d’estre à tout par soy.