Hayne entre les amys & secours trouvé aux e
stranges.

L’oyseau de proye en cerchant sa pasture
Treuve les faons du plongeon dessus l’eau
Manger les veult ce trescruel oyseau
Mais l’eau les sauve & meine à l’aventure.

CEulx la souvent qu’on pense bons amys,
Sont apperceuz & trouvez ennemys.
Et ceulx qu’on cuide ennemys sans pitié,
Sont ceulx desquelz on recoeuvre amitié.
Comme il appert par cest oyseau saulvage
Qui vient cercher proye sur le rivaige
Des grandes eaux ou le plongeon se tient,
Et dans son nid ses petis entretient.
Celluy plongeon habitant sur les eaux,
Y faict son nid entre les verds Roseaulx,
Et la nourrit ses petis doulcement,
Mais l’aultre oyseau y vient cruellement
Pour les manger & est tant impiteux,
Qu’il descongnoist estre oyseau ainsi qu’eulx,
De faict s’efforce à les prendre & manger,
Mais l’eau les mect hors de ce grand danger,
Car elle croist si merveilleuse & forte,
Que les petis & le nid elle emporte,
Sans les grever & les meine à bon port,
Les preservant de peril & de mort.
Ces oyseaulx doncq ont trouvé gracieuse
L’eau de la mer qui est tant perilleuse,
Et au contraire ont trouvé cruaulté,
Peril de mort sans nulle loyaulté,
En ung oyseau de leur genre & coustume,
Qui est comme eulx vestu de belle plume.