Peril & danger de tous costez.

De tous costez treuve qui me faict guerre
Moy pauvre lievre & suis si tressurpris,
Que chiens me font la chasse sur la terre
Et en fin suis du lievre Marin[1] pris.

COmme ce lievre est pris de tous costez
Et n’a refuge en terre ny en mer,
En tous perilz ainsi sommes boutez
Et es dangers pleins de fiel & d’amer
Nous ne faisons que l’aage consommer
En tous ennuiz, en grande paour & craincte.
Sy ung danger ne nous peult faire ataincte,
Subit viendra une aultre fascherie.
Mal dessus mal croist la douleur sans faincte,
Ainsi l’estat de ce monde varie.

★ Nous n’avons poinct ung quint d’heure asseurance,
Pour demourer en estat permanent,
D’estre certains n’avons point d’apparence,
Que de cela que voions maintenant
Sy eschappez sommes incontinent
De maladie ou aultre tel exces,
Tantost viendra quelque doubteux proces,
Qui nous mettra en grand perplexité,
Et si cela ne faict sur nous acces,
Il nous viendra plusgrande adversité.