Suffisance.

Depuys que je suis toute pleine
De l’eau de la clere fontaine
Je rejecte le surperflus
Il me suffit, & n’en veulx plus.

SUffisance est la vertu treslouable,
Qui faict les gentz riches & oppulentz
Contentement faict tout homme honorable
Qui ne requiert les biens trop excellentz:
O que sont folz ceulx la qu’on void dollentz
D’avoir trop peu, ausquelz riens ne suffict
Sy en tous cas ilz ne font leur prouffict,
Et toutesfoys quelque prouffict qu’ilz facent
Leur convoitise & desir ilz n’effacent,
Mais se nourist comme le feu soubz cendre,
Biens dessus biens convoitent & embrassent
Sans se vouloir à raison condescendre.

★ Le cueur de l’homme est tant mol & petit
Et toutesfoys grandes choses convoite,
Rassasier ne peult son appetit,
Combien qu’il soit en maison si estroicte,
L’oppinion qu’il à n’est pas bien droicte,
Puis qu’il pretend les superfluytez,
Pour mieulx complaire aux s’ensualitez [=sensualitez]
Et n’est content du bien qui luy abonde,
Tout le tresor & richesse du monde
Ne luy suffict, il est de telle sorte
Que l’ardent feu, & flamme furibonde
Qui brusle tout criant apporte apporte.