Les riches s’exemptent des loix, mais
les povres y demeurent.

La loy est enfraincte
Par l’homme opulent,
L’homme foible & lent:
Ha d’icelle crainte.

L’Araigne avoit sa belle toille ourdye
Et l’achevant pour un temps la laissa,
Mais il survint une guespe estourdie:
Qui la rompist, & par dedans passa.
Laraigne [=L’araigne] adoncq bien fort se courrouça,
De voir ainsi gaster son petit bien:
Le sens deffaut à lors qu’on perd le sien.
Elle luy dist: qui te meut de deffaire
Acoup, cela que j’ay fait à loysir?
  Link to an image of this page  [B6v p28]Respond la guespe, & qu’en as tu affaire?
Ce que j’ay faict: je l’ay faict pour plaisir.
Ha (dist l’araigne) or voy je bien gesir
Morte à l’envers droicture, & equité:
Car de pecher les gros ont liberté.

Bien tost apres une mousche petite
Cuidant passer: dedans s’enveloppa.
Dont folle feust: car l’araigne despite
Dedans ses retz promptement l’atrappa.
Et si souvent sont tendre corps frappa,
Qu’il demeura presques tout affollé:
Le plus petit est tousjours plus foullé.

Ainsi est il des edits de ce monde:
Le sage en fait la demonstration.
Car le puissant en qui richesse abonde,
Les enfraindra sans reprehension.
Le povre aura griesve punition
S’il contrevient au moindre poinct qui soit:
Voyla comment la faveur nous deçoit.