Le malfait retourne à son maistre.

Le mal qu’on pourchasse
A tort à autruy,
Souvent sur celuy
Revient qui le brasse.

LA vipere (cruelle beste)
Quand desir ha de concevoir,
Vient du serpent lascif, la teste:
Dedens sa gueule recevoir,
Mais le mal est à la ravoir,
Pource qu’estant d’ayse ravie.
De la ronger fait tel devoir:
Qu’elle luy ravist teste, & vie.
Ceste beste conçoit à l’heure,
Puis fait ses petits en temps deu,
  Link to an image of this page  [B7v p30]Et lors il convient qu’elle meure:
O plaisir cherement vendu.
Or luy est son malfait rendu,
Car de ceux à qui el’donne estre,
Son ventre est crevé, & fendu:
A l’heure qu’ilz viennent à naistre.
Le prouffit qui vient de malfaire
Se peut voir icy par effect,
Et pource au prochain on doit faire:
Ce qu’a soy on veut estre fait.
Dieu est juge seur, & parfait,
Et le mal que le fol machine,
Sur luy mesme tomber il fait:
Affin de le mettre en ruine.