Sur ce mesme propos bien est introduict[1]

parlant à tous humains.

Qui desire bien
Qu’il travaille bien,
Qui ainsi sera
De moy jouyra.

L’Altitonant[2] en ses faitz admirable
Par qui tout est sagement dispensé,
Ayant esté par l’homme miserable
Au beau vergier griefvement offencé:
Il le maudist pour avoir trangressé:
Et condamna sa liberté ravie
D’estre à labeur en tout temps asservie,
Puis en sueur, yssant par peine dure,
User du bien necessaire à sa vie:
Bien desiré à de toute creature.

De ce forfait fiere mort prist naissance,
C’est le loyer par peché merité.
Lors dur labeur submist à sa puissance
L’ingrat Adam: & sa posterité.
Qui feust privé de la felicité
Dont jouyssoit son ame bienheureuse,
Voir & contraint, en peine langoureuse
Gaigner le pain propre à sa nourriture:
Ainsi perdist par coulpe malheureuse
  Link to an image of this page  [D8r p63]Bien desiré de toute creature.

Bien c’est mon nom qui rends [=rend] par ma largesse
Humains esprits contents & bienheureux,
Et aucuns d’eux despourveus de sagesse:
Pour mon amour tristes, & langoureux.
De ma faveur plusieurs sont desireux
Mais les uns m’ont & garder ne me veullent,
Les autres non, dont se plaignent & deullent
Brief à m’avoir tous prennent soing & cure:
Ainsi je suis, & bien nommer me peuvent:
Bien desiré de toute creature.

Hommes mortelz Dieu par sa providence
Pour soulager des povres l’indigence
Ma [=M’a] ordonné, car telle est ma nature:
Qui me fait estre en vraye experience,
Bien desiré de toute creature.