Enquerir ne faut plus que
le sens humain ne peut
porter.

Ne trop ne peu: le moyen est louable.
Car souvent choit qui veut monter trop haut,
Pource enquerir par vain savoir ne faut:
Les hauts secretz dont l’homme n’est capable.

THales Philosophe ancien
Et surnommé milesien
Cheminoit un jour par les champs,
Oyants les armonieux chants
Des oyseaux: qui de leurs voix nettes,
Desgorgeoyent maintes chansonnettes.
Ce bon homme (ainsi qu’il alloit)
Tousjours les astres speculoit,
Pour savoir par astrologie
Comme toute chose est regie,
Et puis apres pour parvenir:
Assavoir ce qu’est à venir.
Or advient qu’ayant les deux yeux
Droit eslevez contre les cieux,
  Link to an image of this page  [E1r p65]Un si grand malheur luy escheut,
Que dedans une fosse il cheust:
Dont bien estonné se trouva,
Et qui plus est fort se greva.

Là survindrent deux bons gautiers
Qui l’en tirarent volentiers,
Dont l’un luy dist, O homme sage
Comme pourrois tu par presage
Savoir toute chose future,
Quand ceste presente advanture,
Que devant tes yeux tu vois estre:
N’as pas sceu encores congnoistre?
Si à tes piedz regardé eusses,
(Pour vray) ainsi tombé ne feusses.
Parquoy ton oeil trop eslevé,
A fait: que ton corps est grevé.

Contemplons doncque la qualité
De l’humaine fragilité,
Sans tascher d’avoir congnoissance
De ce que la divine essence
Reserve à soy tant seulement:
Car enquerant trop hautement,
Le sens humain s’esblouira:
Et en confusion cherra.